19 yanvar 2018-ci il tarixində “Synergy Group” MMC-də 20 Yanvar - Ümumxalq Hüzn Gününə həsr olunmuş toplantı keçirilmişdir.
Toplantıda iştirak edən “Synergy Group” MMC-nin əməkdaşları 20 Yanvar şəhidlərinin xatirəsini bir dəqiqəlik sükutla yad ediblər. Sonra “Synergy Group” MMC-nin İcraçı direktoru İsmayıl Süleymanov çıxış edərək qeyd etdi ki, 20 Yanvar tarixi Azərbaycan xalqının qəhrəmanlıq səlnaməsidir.
Bildirildi ki, bu tarix Azərbaycanın istiqlal yolunun ilk zirvəsi idi. 1990-cı il yanvarın 19-dan 20-nə keçən gecə Bakıda sovet ordusu tərəfindən dinc əhaliyə qarşı dəhşətli, kütləvi qırğın hadisəsi törədildi. Bu qanlı hadisənin törədilməsində əsas məqsədlərdən biri öz haqlı tələblərini irəli sürən, bu tələblərə demokratik yollarla nail olmaq istəyən, istiqlaliyyət, azadlıq, suverenlik istəyində olan Azərbaycan xalqının iradəsini qırmaq, insanların müstəqillik arzularını tankların tırtılları altında əzmək idi. Lakin, xalqımıza qarşı misli görünməmiş qəddarlıq edilsə də, buna nail olunmadı, milli qürurumuzu qıra bilmədilər.
Vurğulandı ki, yalnız Ulu öndər Heydər Əliyev xalqın təkidli tələbi ilə ikinci dəfə hakimiyyətə qayıtdıqdan sonra 20 Yanvar hadisələrini lazımınca qiymətləndirmək yolunda ciddi addımlar atıldı. Şəhidlərin ailələri dövlət qayğısı ilə əhatə edildi. Ulu öndər Heydər Əliyevin daxili və xarici siyasətini uğurla davam etdirən Prezident İlham Əliyev 20 Yanvar faciəsində qətlə yetirilənlərin, müharibə veteranlarının, şəhid ailələrinin, əlillərin problemlərinin dövlət səviyyəsində həllini mühüm vəzifələrdən biri kimi qarşıya qoyub. Ali Baş Komandan, Prezident İlham Əliyevin qətiyyətli addımları zəmanət verir ki, vaxt gələcək işğal altında olan torpaqlar azad ediləcək və qələbə günü qeyd ediləcək.
